الله أكبر يا عرب وين الضمير .............الضماير ميته قبل الحيات

عليت براس رجم ٍ كني أهدج
.............عظيم الهم عن نومي كفاني
هواجيس ٍ ودمع العين يدرج
.............مثل جمر ٍ على خدي كواني
بديت أشكي وأطق الناب وأسهج
.............ألوم الحظ بالغربه رماني
غريب وقلة الحيلات تحرج
............. كريم إن قال ضيف ٍ ما قراني
سمع بي ذيب من همه يلجلج
.............يولف من قديمات المعاني
ألا يالشاكي الباكي تبهّج
.............عسى يكفيك ربك ما بلاني
مرارة عيشتي بالدو تخلج
.............بها عربان من شام ويماني
بداية قصتي والبرد يدهج
.............على فصل الربيع المعشباني
نسايم ذعذعت والليل أدعج
.............كثير الناس ظنوها تهاني
وعم الخير والمرباع نوّج
............. تزين بالنفل والديدحاني
وعند البدو نيران ٍ توهوج
.............تنادي هاشل الليله أماني
ونجر ومعمل ودلة تدوج
.............بربعة شيخ سمح ٍ مرحباني
سوالف صامله ما هيب تسمج
.............على قولة نعم تاخذ ضماني
ومنسف دافي ٍ للكل يدرج
.............عليه السمن يسكب بالصحاني
وبنت ٍ للشرف بالساق تدمج
.............عليها نقش يشرق بالبناني
فتورة طرف تومي لك وتغنج
.............عليها تاج حورية جناني
ووجهه ٍ منه كل الزين يحرج
.............مثل بدر ٍ بلغ سبع وثماني
وخد ٍ كالمرايه فوق مَدْرَج
.............وعين ٍ عين حر ٍ ما يداني
وردف ٍ لا مشت بالهون يرتج
.............وخصر ٍ ينحني له عود باني
وخشم ٍ سيف ومبيسم مفلّج
.............وعنق ٍ عنق ريم ٍ مودماني
دوى للعاشق اللي قام يهدج
.............بعين الحب في سوق الحساني
يقول الذيب يا سلطان أبهج
.............تبسم لا تبالي بالزماني
تصنّت للحكايه جات تلهج
.............على ما قيل كانت يوم كاني
من السرحان لين أشعاب حدرج
.............أنا وأمي تقاذفنا المحاني
بإسم الجوع بالدنيا نعرج
.............عسى الرحمن يفرج ما نعاني
تفاجانا ونور الشمس يسهج
.............غنيم ٍ كلها عِدْل ومتاني
خطفنا سايمه بالكاد تدرج
.............بعيده ما توخيها الأذاني
فطنها راعي السو وتلجلج
.............ولا مرت على هذا ثواني
ركض للبندق ومد وتفرج
.............وطخ أمي وأنا جالس مكاني
عويت بونة ٍ والغرب يسرج
.............وأخذت الدرب ودروبي مداني
لفقد أمي شجف قلبي تفلّج
.............صغير ٍ كنت في هاك الزماني
يدور الليل وأيام ٍ تدوهج
.............يسير العمر وسنيني ثماني
عرفت الحب دام الحظ أعوج
.............عسى أنسى جروحي مع حزاني
وليلة فرحتي همي تولج
.............ولا أدري ليه به ربّي بلاني
لفى صياد وكلابه تعجعج
.............تنابح كنها في أمر ثاني
برقت وصارت الدمعه تدحرج
.............على الوجه المضرّا للهواني
صرخت وكنها بصدري تحشرج
.............ذبحتم عشقتي يا أهل الطماني
تولّت فرحة عيون ٍ تهدّج
.............على فرقا الوليف المزهياني
كذا الأيام بالدمعه تضرّج
............. كذا الأزمان ما تخلف زماني
قناع ٍ يخفي الوجه المزرّج
.............سراب ٍ ينخدع به مظمياني
وهاذي قصتي والله يفرج
.............على حالي وأنا أشكي له هواني
وأقفى الذيب وأفكاري تلجلج
.............وعوّى عوية ٍ كنه بكاني
عرفت أنّ المصايب دوم تفرج
............. وأنّ الكل بالدنيا يعاني
---------------------------------------------

هيضتني وازعجتني الذكريات
.............وأشهرن بهموم قلبي الخافيات
ذكرياتٍ كايناتٍ بالقديم
.............متبعات سنين عمري الماضيات
حرّكن فيني دواليب الوجود
.............خافقاتٍ في ضلوعي المهدفات
ممرضات القلب ما له من طبيب
.............مسهرات العين عن لذّ المبات
محديات النفس عن طيب الطعام
.............مضعفاتٍ للجسوم ومبليات
لاعباتٍ في قلوب العاشقين
.............مسقيات المر من عقب الحلات
واطربني الورق في لدن الغصون
.............صادحاتٍ ساجعاتٍ راعبات
منشداتٍ مطرباتٍ باللحون
.............ضاحكاتٍ أو يكونن باكيات
ساعياتٍ خلف رزق ٍ ما يفوت
.............غادياتٍ موملاتٍ رايحات
ساعيات ٍ لا تكل ولا تمل
.............بالأمان وبالسكينه عايشات
ليتني كالورق ما عندي هموم
.............لا مصايب لا أمورٍ معضلات
لا هوايل شيّبت راس الرضيع
.............لا هواجس زلزلنّ الراسيات
ليتني كالذيب ما عندي هموم
.............سارح ٍ بفجوج ربي الواسعات
ليتني في البعد مثل الفرقدين
.............غايبٍ عن بال كل الكاينات
التمنّي ما يفيد العاقلين
............. والليالي مقفياتٍ مقبلات
والحقيقه طعمها مر المذاق
............. ما يغيّرها كثير الأمنيات
يوم شوفي للحقايق والصحيح
.............طار عقلي مع هبوب الذاريات
يلعبن به من يمين ومن يسار
.............مجحفاتٍ مجنفاتٍ مصلفات
نافجاتٍ في ديارٍ للعرب
.............ما بقى غير الرسوم العافيات
هلّت العبره على خدّي سفوح
.............يوم شفت دموع مسلم سايلات
عرق قلبي خجّه السهم المصيب
............. والعروق الباقيات مسنجدات
كن كبدي يحرقه جمر الغضا
.............ملوّع ٍ من شوف كيد الكايدات
الله أكبر يا عرب وين الضمير
.............الضماير ميته قبل الحيات
دالهينٍ هايمينٍ عاميين
.............ضايعينٍ تايهينٍ بالجهات
ديرة الاسلام في ذلٍ مهين
............. عقب عزٍ فوق روس الشامخات
والعروبه ضيّعوها بالطبول
.............والغناوي والنسا والمسكرات
وين ما وجّهت بارض المسلمين
.............تسمع الصيحات فيها معولات
محزناتٍ مبكياتٍ منحبات
.............عن رضيع ٍ يذهلنّ المرضعات
المذابح والمجازر والدمار
.............الصحايف في خبرهن ذايعات
وين أنتم عن خبرهن نايمين
............. وين أنتم يالقلوب الغافلات
ساهجينٍ ساهيينٍ لاهيين
.............لو تنادي ما يجيبون الندات
لو تشاكي أو تباكي ما نخوك
.............وش يفيد الحي لو ينخى الموات
مخزيين العين في وقت الليان
.............وبالشدايد تكتشفهم كالغثات
بالعراق المسلمين يذبّحون
.............طايراتٍ غايراتٍ قاصفات
بالنهار وبالليالي حايمات
.............قاتلاتٍ فاتكاتٍ مهلكات
ممطراتٍ بالقنابل كالغيوم
.............والمدافع بالقذايف راجدات
ضارباتٍ للمساكن والبيوت
.............للمآذن والمساجد هادمات
فاتكاتٍ في ألوف الابرياء
.............مفنياتٍ للنفوس المسلمات
العذارى كالطيور المفجعات
.............باكياتٍ بالليالي المظلمات
محرقاتٍ بالعباري للخدود
.............خططن خطين فيهن داميات
مات أبوهن أو اخوهن أو حبيب
.............والأرامل والثكالى صايحات
نايحاتٍ لاطماتٍ عالخدود
.............نوحهن بكّى صخورٍ قاسيات
أحزنوهن يالنشامى المعتدين
.............ما تهبّوا تنصروهن يالحمات
ناخياتٍ للعروبه من يجيب
.............ناخياتٍ للشغاميم الكمات
السيوف مصدياتٍ فالغمود
.............من يعيد أيام عزٍ ماضيات
من يجدد هيبةٍ للمسلمين
............. من يسل السيف في وجه العدات
يا إلهي يا سميع ٍ للدعاء
.............يا مجيبٍ ما تفوتك من شكات
يا عزيزٍ يا قوي ٍ يا متين
.............يا عليم ٍ بالأمور الخافيات
يا حليم ٍ يا رحيم ٍ يا كريم
.............دوني البيبان صارن مغلقات
أسألك يا عز من هو يرتجيك
.............يجتمع شمل العرب عقب الشتات
وأسألك يا رب نصر المسلمين
............. وعزّة الاسلام يا جزل العطات
وترتفع رايات عزّه عاليات
.............خافقاتٍ فوق روس الشاهقات
والمعادي تجعل الذله عليه
............. والهزايم في جيوشه دايرات
يا إله العرش يا مجري السحاب
............. القنوف المركمات المرزمات
القوي الباس محدٍ له خصيم
.............استبدّت يا إلهي هالطغات
استباحوا دم كل المسلمين
............. كل يوم ٍ فوق أرضك مسفحات
واستباحوا عرض كل المسلمين
............. يا إلهي من عذارى صارخات
واستباحوا كل شي ٍ له حدود
............. يا إلهي ما تعاقب هالعصات
يا إلهي واهدنا درب الرشاد
.............يا إلهي نرتجي منك النجات
وبالختام أرجيك بلّغ بالسلام
............. محمد المختار مع أزكى الصلات
--------------------------------------------

رحت البحر والنفس جاها احباطا
.............والصدر ضيّق يوم جلست بالشط
يدني علي الموج فيه اختباطا
.............ويبعد ويلقى تالي ٍ فيه يخبط
سفن ٍ تروح وسفن تاتي قلاطا
.............تقطع غباب الموج يا كنها تنط
ناس ٍ تفصخ شفت فيها انحطاطا
.............تلبس قصير الثوب وتعوم كالبط
وناس ٍ تخم بزاد كله بطاطا
.............وألوان من رزق البحر منه تمسط
مزينينه في خيار وطماطا
.............ورجل ٍ متين ٍ بأخضر الخس يقرط
وربع ٍ تسلوا بالهروج الجفاطا
.............مستانسين بخبل سفه ٍ مشبط
قلت أبعدوا عني كثير الخباطا
.............ما أبغى أشوف الشط والغط والنط
أنا غرامي بالسهول البساطا
............. وشمة ذعاذيع الهوا يوم تقلط
وشوف الجبال بطلع نبت ٍ تحاطا
.............يقنب بعالي أشعافها الذيب الأمعط
وشد الهجن لا قيل نبغى الفحاطا
.............وعسف الأصيل إن شاس راسه وعطعط
يقحص برجله دون ضرب السياطا
.............مع أشقر ٍ نادر على الجول يفرط
بين الثنادي ضربته بالشباطا
.............يفرح به القناص من يوم يقلط
وصف الدلال مشاديات البطاطا
.............جمر الغضا من تحتهن قام يشتط
وبنت ٍ هنوف لثامها مايماطا
............. ما تتبع العشاق والليل منغط
والله لو حَطّت عليها القراطا
.............إلا تباهى القرط من يوم ينحط
الثوب ما يزهاه زين الخياطا
.............الثوب يزهى بلابسه حين يمقط
لا فج ضو الشمس قامت تماطا
.............وضافي شعرها فوق الأرداف يسقط
والله قلبي بالمخيرز يخاطا
.............وقت الضحى لا شفت شعره يمشط
حسدت ميل ٍ بين رمشيه حاطا
.............يا ليتني كحل ٍ بعينيه ينحط
عيني تراعي دربها وين تاطا
.............لو مت حطوني بدربه مقشرط
حتاني أسمع صاحبي يوم ياطا
............. وأسمع ذريف دموعها حين تسقط
تسقي ثرا ميت ٍ بحبه تعاطا
.............وتسمع جضيضي يوم الأرياح تسفط
يالله يا مهدي لحد الصراطا
.............لا لا تعذب صاحبي إن كان فرط
اجعل عليها من كتابي حطاطا
.............خلي ذنوبه من حساني تنحط

» قدم لكم أكبر مكتبة الالعاب عاليه الجوده 3D
» الله يبعد عناا الهم
» فضل عاشوراء والمستحب فيه للعلامتين بن باز وبن عثيمين رحمهما الله والدي يارب