تدري وش اللي ضايق منه صدري ............انك تعيش الدور زعلان دايم تدري وش اللي هيج اليوم فكري

مشكلتك انك حلو وبالحيل مغري
............ومشكلتي اني فيك مغرم وهايم
ياكثر غلطاتك وياطول صبري
............واصغر ذنوبك بالشريعة جرايم
وان ما اقنعك بعض الاحيان عذري
............ ياسرع ماتصبح على الحب سايم
تدري وش اللي يشغل الحين فكري
............اتخيلك مرة عن الشك شايم
تدري وش اللي ضايق منه صدري
............انك تعيش الدور زعلان دايم
تدري وش اللي هيج اليوم فكري
............اني على فرقاك ماني برايم
طالت بك الغيبات واحترت بامري
............ومن طول الغيبات جاب الغنايم
سنة شهر اسبوع ايام ماادري
............مير الوكاد اني عن الياس صايم
اخطيت بالميلاد واخطيت هجري
............وحاولت احقق شي غير الهزايم
قدمت ماعندي وخالفت عصري
............وماهمني في الله لومات لايم
عمري معك ايام وسنين تجري
............وان بار حظك ماتفيد التمايم
باكر عسى باكر به الخير يحري
............تضحك لنا الايام والحظ قايم
وان كان تلقى شخص يغليك كثري
............اقص يدي واقضي العمر هايم
-------------------------------------------

ان كان ماتت بالضمير الاحاسيس
............يا هل ترى من دونها نصنع انسان
تعبت اقلب بالكتب والقواميس
............ واقف من اللهفة على كل عنوان
حتى مضى عامين واستنكر ابليس
............قام ودعى في حضرته كل شيطان
قال الفتى هذا علي كوابيس
............عامين في حلقي وانا منه تعبان
ونادى علي ابليس عقب الوساويس
............وش قيمة الانسان من غير وجدان
وصحيت من سكرة حلوم المفاليس
............وناديت ياليل الشقا يكفي ادمان
ياليل مامليت كثر الهواجيس
............حرام فيني ترتكب جرم الاحزان
نويت اسافر عن زمان المناحيس
............واركب بساط الريح في صحبة الجان
ونجيب في لمح البصر عرش بلقيس
............فوقه عصا موسى وخاتم سليمان
يمكن تجدد للاوادم مقاييس
............تقلب مفاهيم الحضارة والازمان
ترسم على وجه الحزينة نواميس
............تعلن سعادتها عقب طول حرمان
وان كان ردت للحياة الاحاسيس
............فهل جزى الاحسان الا بالاحسان
-------------------------------------------

قالوا وداع الصيف في مطلع سهيل
............وسهيل طالت غيبته وانتظاره
وشبت على صدر الزمان القناديل
............رفرف على النيا جناح الحرارة
الفكر ما يصفى بكثر المشاغيل
............والنفس ماترتاح وسط الحضارة
خل المدينة واطلب الله تباديل
............تلقى العوض في واسعات الصحارى
بين الفياض وشامخات المنازيل
............ارواح تحيا من بديع الخضارى
العشب والنوار والمزن والسيل
............يجلي عن القلب الحزين المرارة
وبيوت ترمي للرياح المناديل
............اخير من قصر طويل المنارة
ومجلس شرف تقبل عليه الرجاجيل
............الكل منهم فيه يحفظ وقاره
يطرب على صوت النجر والفناجيل
............والا الردي في ذاك قل اعتباره
والسالفة تحشم عن القال والقيل
............واللي يعز القول حسن اختياره
وساعة ترد الروح مع صهوة الخيل
............تسوى نهار كامل بالغمارة
نجمة تخاطب بالسما ظلمة الليل
............مستنكرة في ذا الزمان الحقارة
شافت على الكوكب رجال مهازيل
............رجال لكن في قلوب العذارى
اشباح تسكن وسط صخر التماثيل
............وجيه سوء واقنعه مستعارة
مايعرفون من المكارم تنافيل
............ولا يفهمون من المراجل عبارة
انذال مافيهم مروة ولاحيل
............متحينين في غفلة الناس غارة
عند الموارد ينصبون المحابيل
............وبين المقابر نافخين الزقارة
الله يبلاهم بطير ابابيل
............ ترمي معاقلهم بسود الحجارة
واشوف لي رجال في هيئة الفيل
............ازرى يميز غترته من وزاره
ثرثار ماتلحق عليه الاقاويل
............يعتاش من كذبه ويقضي نهاره
هذاك خله في عجاج الزعاجيل
............واكتب على صفحة جبينه خسارة
وبالالف ماتلقى من الناس حلحيل
............ صاروا مثل نجم خرج من مداره
دارت رحى الدنيا سواة البلابيل
............وصار الردي يدعى باسم الامارة
لان حرار اليوم وسط الزلازيل
............ طير الرخم ماصار طير الحبارى

-------------------------------------

الله يجيرك من فعول النصارى
............ومن كل نقد ومن كل رسمة مسيئة
واخزيتانا يارسول البشارى
............ياحسبنا الله على الشعوب الرديئة
اهل البقر واهل الدنس والحقارى
............اهل الخنا واهل النفوس الدنيئة
اهل الصليب الفاسقين الفجارى
............اهل العهر واهل الصفات الدنيئة
لادين لااخلاق لامن حضارة
............هذه اوربا والشعوب المسيئة
الله نور الارض وانت المنارة
............ياشمعة الدين الحنيف المضيئة
للله درك يانبي الطهارة
............ ياجامع كل القلوب البريئة
ياسيدي ياكبر فينا الخسارة
............ماتت شيمنا والقلوب الجريئة
الذنب اكبر من مسار اعتذاره
............بل تجرح الاسلام ذيك الخطيئة
اسلامنا يبقى غريب اعتباره
............ويرجع غريب مثل لحظة مجئيه
نشجب ونستنكر امام السفارة
............ودنا النصر ياتي بليلة هنيئة
ياامتي راحت علينا خسارة
............قم صافح اهل البدع والنسيئة
والله لن ترضى علينا النصارى
............يا طالما فينا الحمية وطيئة
ولكن حسبنا قلوبنا كالحجارة
............هذا الهوان اللي كتبته المشيئة
---------------------------------------

المراجل درب مافيها رجوع
............ تجمع اسباب المهالك والنجاة
درب واحد تلتقي فيه الفروع
............ حددت سير الرعية والرعاة
من مشاها لازمه همة طلوع
............مايقارن مستواها من مستواه
الرجل ياخوي ماحبه خضوع
............للسلاطين الطواغيت العتاة
الرجل ياخوي مااحبه قنوع
............ باردى انماط المعيشة والحياة
الرجل ياخوي ماحبه تبوع
............ دس راسه تحت بشت وقال جاه
الرجل ياخوي ماحبه قذوع
............ماوزن هرجه لا منه حكاه
الرجل ياخوي مااحبه سموع
............ للمراة والنفس وابليس وعداه
الرجل ياخوي ماحبه طموع
............كل ماعدى على شي بغاه
الرجل ياخوي مااحبه منوع
............مايجود وماتطهر من رداه
الرجل ياخوي مااحبه دنوع
............ بقق عيونه على بنت قصراه
الرجل ياخوي مااحبه ولوع
............ماخذ الدنيا على هبة هواه
الرجل ياخوي مااحبه نزوع
............ شبة البنزين في عود الغضاة
الرجل ياخوي مااحبه هجوع
............مايلبي صوت حي على الصلاة
في الرجال احبك ساب نفوع
............ ومن عفا عن شخص لا منه قواه
ومن ذكر ربه وبكاه الخشوع
............ومن تبع سنة محمد من صباه
------------------------------

ليالي غرامي دعيتك أجيبي
............جحدني حبيبي وضاعت وعودي
غرامي فريد(ن) وطبعي نجيبي
............ حبيبي تجمّل علينا نعودي
دعيتك وطبعي كرامه وطيبي
............وضاعت علينا حسافه وجودي
أجيبي نجيبي وطيبي نطيبي
............وعودي نعودي وجودي نجودي

----------------------------------

يا كاتب(ن) حزنك على بيض الأوراق
............تعال عندي شوف هاذي أوراقي
تحمل معاها كل صرخات الأعماق
............ودموع طالت حربها في حداقي
سألت أنا الورقا ومالت بالأعناق
............ناحت ولاحت ذكريات(ن) عتاقي
يوم المحبه نامت بستر ووفاق
............في ليلة(ن) تلبس وشاح الزراقي
كان الوفا بدر(ن) تهيا لعشاق
............والكذب شمعه جوفها بانحراقي
تعانقوا والتفت الساق بالساق
............عدّوا مخدتهم عظام التراقي
حلّت سعادتهم وصدر الزمن ضاق
............نوى على الفرقا زمان الشقاقي
وأمطر على الدنيا من المزن براق
............كنه تسل بلمع برقه سناقي
صارت محبتهم تناظر بالارماق
............متحيره بين البقا والفراقي
قالت فراق وصبّر القلب ينطاق
............ وأرجا الحظوظ اللي عليهن طواقي
سألتها وش غلطتي وين الأخفاق
............ صدّت وخلتني على عظم ساقي
لاشك من يعشق يجي يوم يشتاق
............ينطر متى يقبل نهار التلاقي
قال السديري يوم حدّنه الأشواق
............وأقول قوله يوم شب اشتياقي
(ياليت ربي ما خلق حب وفراق
............وإلا خلق حب(ن) بليا فراقي)
ويا كاتب(ن) حزنك على بيض الأوراق
............ وش عاد تكتب حزن وش عاد باقي

---------------------------------------------------

على مشهد جلوس الشمس فوق فراشها البحري
...........تلملم شعرها الاحمر وترفع فوقها العتمة
رسى مركب على متنه قفص في داخله قمري
...........ينوح بداخل القضبان وخارج هالقفص حلمه
تخيل هذه اللقطة لقلبي في قفص صدري
...........واكيد السر بالمشهد تعال ادخل معي فلمه
جرت عادة بهالدنيا تغير طبعها الفطري
...........وتصنع بسمة صفرا نعاني عقبها صدمة
بعضنا عقب هالصدمة يطيح وينتهي الأمري
...........وبعضنا عقبها يمشي ويطلع في يده حكمة
يسلمها لمن بعده ويبقاله بها ذكري
...........ومن يدري متى الدنيا تعود وتصنع البسمة
كلام قبل يبدأ الفيلم جاء من حيث لا ندري
...........وساد الصمت بعيون تنفس ضيق هالكتمة
واشار الوقت للاحداث وقامت يمته تجري
...........تشكل فيلمه المرعب وتكشف عن مدى ظلمه
نرجع مشهد البرعم ونسمع همسه السري
...........(احبك) واستحى البرعم ورد الهمس في جسمه
تعال نوقف الصورة وشوف المنظر المغري
...........فناجيل به وجه البدرفي داخله ظلمه
يحف اطرافه نخل تشوفه ساعة الفجري
...........بهن وسع البحر رحمة بهن بعد السما نقمة
اعرف انك بديت تضيع وفكرك شوشه فكري
...........ترى الفنجال عين ونظرتها هي النسمة
وقلبي ذلك البرعم وهمسه حبي العذري
...........ابيك تعيش هالمشهد بحسك ماابي نظمه
واخلي الفيلم يقطع لك مشاهد لحمها عمري
...........وذاك السر كان فراق وذيك الشمس هي حرمه
عرفت الحين ليه الشمس فوق فراشها البحري
...........تلملم شعرها الاحمر وترفع فوقها العتمة

-----------------------------------------

يا مشرف(ن) راس الجبل وتشوف خلق الله صغار
...........ان كنت ما تدري ترى من تحت يشوفونك صغير
انزل وزور المقبره نادي على كل الكبار
...........واسمع لصمت المقبره يا فلان ما عندي كبير
قامت يدين الاسئله تمتد في حلق الحوار
...........وتدفقت بيض المشاعر في شرايين الضمير
طاحت كراسي واوسمه وبشوت واسم(ن) مستعار
...........من عين زاهد! واثرها اكبر طموحات الxxxx؟؟
والمشكله بعض المظاهر تعبت ناس(ن) كثار
........... لو انهم شافوا الجواهر وفروا الشي الكثير
ويا مشرف(ن) راس الجبل وقّر وتلقى لك وقار
...........واللي يحقّر يحقرونه لو يكون ابن الامير

-----------------------------------

بعض قصائد الشاعر سلطان الرواد الشعلان الرويلي

» اليوم يومك
» لا ترمون قشر البرتقال بعد اليوم